وسط حضور إعلامي وفني وممثلين لكبري الصحف والمجلات والقنوات التليفزيونية الألمانية وبمشاركة 18متسابقا يمثلون مختلف الولايات الألمانية لاختيار ملك جمال ألمانيا لعام 2016 من بين 1200 متسابق شاركوا في المسابقة منذ بدايتها الصيف الماضي وعلي مدار 6 أيام شهدت منطقة خليج أبو سومة بالغردقة المنافسات النهائية لاختيار أجمل شاب بألمانيا.

حضر الحفل عدد لا بأس به من السيدات والسادة، وكانت السيدات المصريات الأصيلات في غاية الاستياء مما يحدث فى المسابقة ومن المناظر، وخصوصا عندما رأوا شباب ألمانيا.

وعندما أجرت (الحكاية) لقاء مع إحدى السيدات قالت: هو إيه أصله ده؟ إيه العيال السيكي ميكي دول؟ دول عينهم ملونة وجسمهم مثالي وما يلفتوش نظري ببصلة! تعالوا شوفوا ابو عمر جوزي اسم النبي حارسه وصاينه قوام وجمال وكرشه يملى عين أرفع رفيع منهم، أبو عمر هوه الآيدول بتاعي مميزاته ما تتقارنش بشوية العيال دول، جوزي ياما أسعفني وقت الشدة، كفاية اني بحضّر السفرة على كرشه، وكله كوم ولما اجي انام كوم تاني، بيفرشهولي مرتبة ومخدة في نفس الوقت، ويا سلام بقى لما احب اتفرج ع التليفزيون واجي كده برومانسية احط الريموت على كرشه، يا الله قمة الإحساس والأمان اللي في الدنيا .. أبو عمر؟ هو فيه زي أبو عمر؟

وعندما أنهينا الحوار مع زوجة "أبو عمر" أخذنا رأى "أبو عمر" نفسه في الحفل فقال: أنا بصراحة اتفاجئت، المتسابقين بسم الله ما شاء الله حاجة كده تشرح القلب، عقدوا الواحد والله بقيت ابص لكرشي ومش فاهم ده عبارة عن إيه بالظبط؟ ده كرش ولا مطب صناعي ولا باراشوت؟ قبل ما انهار بلحظة وافقد الثقة في نفسي بصيت على أم عمر لقيتها قاعدة بتسبّل لى بعينيها وتقولي ربنا يخليك ليا ولكرشك يا سيد الرجالة، وثقتي رجعت لي ف نفسي تاني، وفي البريك قمت مطلع سندوتشات السكالنس اللي معايا ضربناها انا وهيه بكل حب واحترام متبادل.

و(الحكاية) تتمنى لرجال مصر المزيد من إثبات الذات والتفوق على كل شعوب الأرض.